غرد النائب سليم عون عبر حسابه على "تويتر": "كان بعد ناقص اللبناني ذل وبهدلة أكتر حتى يقدر يحصل على جواز سفر، هيدا عدا عن الأضرار يلي عم تصيبو وأغلب الأوقات ما بتتعوض، وما حدا يقول إنو هيدا الموضوع ما إلو حل".
عطفا على هذه التغريدة، نتوجه إلى النائب عون لنقول:
خيي سليم ما عرفنا البهدلة إلا على إيامكم، كنا عايشين بألف خير وماشي الحال، ولما بزغ اسم "التيار الوطني الحر" جبتونا بالأرض، وفي أكتر من كارثة خيي سليم، منبلش بالكهربا، لنوصل لـ "ما خلونا"!
خيي سليم أنا مواطن لبناني، من حقي إسأل مين عطل البلد سنين طويلة؟ مين منع تشكيل الحكومة ليجي رئيس تيارك اللي كان خسران الانتخابات وزير؟ ومين ومين ومين... بس شو قدمت للبنان؟ شو قدم تيارك للبنان؟
الفساد كتر واستشرى من يوم اللي صرتوا بالحكم، ووصلتونا لإنو صرنا نتمنى الهجرة وكتار هاجروا وتركوا "مرقد العنزة" بجبل لبنان خصوصا، وبلبنان عموما، وأراضينا بارت وصارت مرعى لـ "شلعات المعزي".
مش عم نحملك أو نحمل "تيارك" كل المسؤولية، بس وعدتونا تحاربوا الفساد، لصرتوا داعمينو متلكن متل كل المنظومة ويمكن أكتر.
خيي سليم معليه إذا تبهدلت وإنت عم تساوي "باسبور"، حياتنا كلا صارت بهدلة، والفضل بعود لكل خطاب أجوف طائفي غرائزي وزبائني، وما منستثني حدا!
